Lev 20 | NdeIBE | STEP | UJehova wathi kuMosi,

Leviticus 20

Izijeziso zokona

1 UJehova wathi kuMosi, 2 “Tshela aba-Israyeli uthi: ‘Loba ngubani kuma-Israyeli loba kumbe ngowezizweni ohlala kini onikela abantwana bakhe kunkulunkulu uMoleki kabulawe. Izakhamizi kazimkhande ngamatshe.

3 Mina ngizamdela lowomuntu ngimkhuphe ebantwini bakibo; ngoba nxa enikele ngabantwabakhe kuMoleki usengcolise indlu yami engcwele wahlambaza lebizo lami elingcwele. 4 Aluba izakhamizi zendawo zingamnanzi lowomuntu enikela umntanakhe kuMoleki zingaze zambulala, 5 mina ngizamkhalala lowomuntu labomuzi wakhe ngibakhuphe ebantwini bakibo, yena kanye labo bonke abahlanganyela laye njengeziphingi loMoleki.

6 “ ‘Ngizamhlamuka lowo oya ezangomeni lezanuseni njengesiphingi sazo ngokulandelana lazo. Ngizamkhupha kwabakibo.

7 “ ‘Zingcweliseni libe ngcwele ngokuba mina nginguJehova, uNkulunkulu wenu. 8 “ ‘Gcinani izimemezelo zami lizilandele. Mina nginguJehova olenzayo libengcwele.

9 “ ‘Lowo othuka uyise loba unina kabulawe. Usethuke uyise loba unina ngakho usefanele ukufa.

10 “ ‘Aluba indoda ifeba lomfazi womunye – umfazi kamakhelwane – kababulawe bobabili isiphingi lesiphingikazi leso.

11 “ ‘Aluba indoda ilala lomfazi kayise isembule ubunqunu bukayise. Leyondoda lonina lowo kababulawe. Bafanele ukufa.

12 “ ‘Aluba indoda ilala lomalokazana wayo kababulawe bobabili. Lokho asebekwenzile kulihlazo. Bafanele ukufa.

13 “ ‘Aluba indoda ilala lenye indoda ingathi ilala lomfazi, bobabili benze amanyala. Kababulawe. Bafanele ukufa.

14 “ ‘Aluba indoda ithatha umfazi, ithathe lonina, lokhu kubi. Yona indoda labesifazana labo kabatshiswe ngomlilo ukuze kungabi lokuxhwala phakathi kwenu.

15 “ ‘Aluba indoda iphinga isifuyo kayibulawe, isifuyo leso kasibulawe.

16 “ ‘Aluba owesifazana ehahabela isifuyo aphinge laso mbulaleni owesifazana lowo kanye lesifuyo leso kababulawe; ngumlandu wabo.

17 “ ‘Aluba indoda ithatha udadewabo, indodakazi kayise loba ekanina balale bonke, kulihlazo. Kabaxotshwe kwabakibo. Isinqunule udadewabo ngakho isilomlandu.

18 “ ‘Aluba indoda ilala lowesifazana esemfuleni isinqunule umthombo walowomfula laye owesifazana lowo usewembulile. Bobabili kabaxotshwe ebantwini bakibo.

19 “ ‘Ungalali lodadewabo kanyoko loba okayihlo, ngoba kuyikunqunula isihlobo segazi. Lobabili lizakuba lomlandu.

20 “ ‘Nxa umuntu elala lomkamfowabo kayise usenqunule umfowabo kayise. Balomlandu. Bazakufa bengelamntwana.

21 “ ‘Nxa indoda ithatha umfazi womfowabo kuyisenzo sokungcola; usembule ubunqunu bomfowabo. Bazakufa bengelamntwana.

22 “ ‘Gcinani zonke izimemezelo zami lemithetho yami liyilandele ukuze lelolizwe engililethe kulo ukuyahlala khona lingalikhafuli.

23 “ ‘Lingabolandela amasiko ezizwe engizazixotsha phambi kwenu. Ngokuba bazenza zonke lezizinto ngabenyanya. 24 Kodwa ngathi kini, “Lizalithumba ilizwe labo; ngizalipha lona libe yilifa lenu, ilizwe eligeleza uchago loluju.” Mina yimi uJehova uNkulunkulu wenu olenze lehluka kwabezizwe.

25 “ ‘Ngakhoke yenzani umahluko phakathi kwezinyamazana ezihlanzekileyo lezingahlanzekanga; kanjalo lezinyoni. Lingazingcolisi ngezinyamazana loba ngezinyoni loba ngani ehuquzela phansi – lezo engizihlunguleyo ngathi zingcolile kini.

26 Kumele libe ngcwele kimi ngokuba mina uJehova ngingcwele njalo ngilahlukanisile kwabezizwe ukuthi libe ngabami.

27 “ ‘Indoda loba umfazi ovumisayo loba oyisanusi phakathi kwenu kabulawe. Bakhandeni ngamatshe. Yindaba yabo.’ ”